Кәсіпкерді өзін өзі өлтіруге жеткізді деген күдікпен экс-депутат, 90-жылдардың «авторитеті» ұсталды

Таразда нан зауыттарының бірін басқарған кәсіпкердің мәйіті табылып, оны өзін-өзі өлтіруге жеткізді деген күдікпен атышулы «Қырықбаевтар» қылмыстық тобының мүшесі қамауға алынды, деп хабарлайды Politico.kz порталы Orda.kz-ке сілтеме жасап.

Тараз қаласындағы көшелердің бірінде орналасқан банк бөлімшесінің жанынан басына оқ тиіп қайтыс болған 35 жастағы кәсіпкер Елнұр Маймақовтың мәйіті табылды.

Жергілікті нан зауыттарының бірін басқарған марқұм қайғылы оқиғаның алдында танысының үйінде қонақта болып, екеуінің арасында карта ойынынан туындаған қарыз дауы ушығып кеткен.

Ойыннан кейін далаға шыққан кезде қарыз беруші ақшаны қайтаруды талап еткен. Бұған жауап ретінде кәсіпкер қару шығарып, қарсыласына қарай екі рет оқ атқанымен, ешкім зардап шекпеген.

Бірнеше минуттан кейін ер адам үшінші оқты өзіне бағыттап, сол жерде көз жұмған. Жәбірленушінің денесін таңғы намазға бірге баруды жоспарлаған танысы тауып алған және оқиға орнынан ешқандай есепте тұрмаған травматикалық тапанша табылды.

Жамбыл облыстық полиция департаментінің мәліметінше, қазіргі уақытта адамды өзін-өзі өлтіруге жеткізу бабы бойынша сотқа дейінгі тергеу амалдары басталды. Негізгі нұсқа ретінде марқұмның ірі көлемдегі қарызы мен құмар ойындарға тәуелділігі қарастырылып жатыр. Осы іске қатысты басты күдікті ұсталып, уақытша ұстау изоляторына қамалды.

Қолда бар ақпаратқа сүйенсек, бұл істің басты фигуранты «Қырықбаевтар» қылмыстық тобының серкелерінің бірі Алмас Қырықбаев болып отыр.

Ол 2007 жылы жергілікті компания директорынан $10 мың бопсалады деп айыпталып, жауапкершіліктен жалтарып кеткен. Күдікті аты-жөнін Мадияр Өскінбаев деп өзгертіп, Біріккен Араб Әмірліктеріне қашып кеткендіктен, оған халықаралық іздеу жарияланған еді.

2023 жылы ұсталғанымен, қылмыстық істің ескіру мерзімі өтіп кетуіне байланысты жауапқа тартылмай, содан бері Тараз қаласында өмір сүріп келген.

Жалпы Қырықбаевтар отбасында 10 ағайынды бар және олар 90-ыншы жылдардың басында ұйымдасқан топ ретінде танылған. Ағайындыларды Қайрат Қырықбаев басқарса, Алмас оның оң қолы саналған.

Сол жылдары қылмыстық топ серкелерінің бір бөлігі шетелге қашып, тоналған ақшаға заңды бизнес ашса, енді бірі құқық қорғау органдарының арнайы есебінде тұрғандықтан, тегін өзгертіп мәслихат депутаттары болып сайланған. Мәселен 2000-ыншы жылдардың басында екі ағайынды халық қалаулысы атанып, Нұрмахан Өскінбаев қалалық мәслихатқа, ал Мадияр Өскінбаев деген жалған есіммен Алмас Қырықбаев облыстық мәслихатқа өткен болатын.