"Кетеміз-ау, Қазақстаннан": Тәуекел Мүслімге де салық органдары хабарласты

Мемлекеттік кірістер комитеті (МКК) блогерлер мен өнер жұлдыздарына жіберілетін салықтық хабарламаларды жалғастыруда, деп хабарлайды POLITICO.KZ.

Бұл жолы актер әрі тележүргізуші Тәуекел Мүслім мемлекеттік кірістер органдарына шақырту алғанын мәлімдеді. Ол Instagram желісіндегі парақшасында Алматы қаласы, Алмалы ауданы бойынша мемлекеттік кірістер басқармасына барғанын хабарлады.

«Ассалаумағалейкум, не дейін? Жағдай былай, 2022-2023 жылға Kaspi-дан 5000 теңгеден жоғары қандай ақша түсті, соның бәріне есеп бер деп жатыр. Кімнен түсті, не үшін түсті. Сөзім жоқ. Бұл тек 2022-2023, алды 2024-2025 тұр ғой. Не істейміз? Кетеміз-ау, Қазақстаннан», – деп жазды ол Instagram stories-те.

Еске сала кетейік, 2024 жылдың ақпан айында МКК 594 блогер мен инфлюенсердің 2022-2023 жылдардағы кірістерін жасырғанын анықтағанын хабарлаған болатын. Мемлекеттік орган өкілдерінің айтуынша, олар табыстарын салық декларациясында дұрыс көрсетпеген.

Билік салықтық бақылауды күшейтіп, цифрлық экономикадағы жеке кәсіпкерлердің табысын заңдастыруға тырысып жатқанын атап өтуде.