Маңғыстауда бұрғылау мұнарасы құлады

9 шілде күні Маңғыстау облысындағы Теңге мұнай кен орнында бұрғылау мұнарасының құлау дерегі тіркелді. Бұл туралы облыстық Төтенше жағдайлар департаменті ресми түрде хабарлады.

Ведомство мәліметінше, апат "Petro МұнайГазСервис" компаниясы мұнараны көлденең күйге келтіру жұмыстарын жүргізіп жатқан кезде орын алған. Компания бұл жұмыстарды мердігер ретінде атқарған.

Оқиғаның мән-жайын анықтау үшін өндірістік қауіпті нысанды пайдаланушы мекеменің жанынан арнайы комиссия құрылып, тергеу жұмыстары басталды.

Абырой болғанда, мұнараның құлауынан ешкім зардап шекпеген. Қазір оқиға орнында қауіпсіздік шаралары жүргізіліп жатыр.