Маңғыстау облысында асыл тұқымды 40 ешкі бұралқы иттерге жем болды

13 тамыз 2024, 23:40 1073

Маңғыстау облысында асыл тұқымды 40 ешкі бұралқы иттерге жем болды

Маңғыстау облысының Мұнайлы ауданына қарасты Батыр ауылдық округіндегі шаруа қожалығының иесі таңғы 4-5-тер шамасында бұралқы иттердің қорадағы асыл тұқымды ешкілерін қырып кеткенін айтып, жәрдем сұрады, деп хабарлады politico.kz mangystaumedia.kz-ке сілтеме жасап. Оқиға Батыр ауылындағы Толқын, 67 мекенжайында болған. Бейнежазба иесінің айтуынша, бұралқы 5 ит қораға кіріп, 26 бас асыл тұқымды ешкісі мен 14 бас лағын қырып кеткен.

Бұл асыл тұқымды ешкілерді «Нұр капитал» бағдарламасымен несиеге алып, бағып жатыр едім. Сүтін ауыратын үлкен кісілерге беріп, ірімшік, құрт, қаймақ өнімдерін алып отырғанмын. Бір отбасын бағып отырған ешкілерімді бұралқы иттер екі сағатта қырып салды, - деді кәсіп иесі Құмар Нұрпейісова Mangistau_story парақшасына қалдырған жазбасында.

Мұнайлы аудандық кәсіпкерлік және ауыл шаруашылығы бөлімі басшысының орынбасары Бекболат Қабатбаевтың айтуынша, жануарларды қорғау туралы заң шыққаннан бері бұл бағытта реттеу жұмыстары жүргізіліп жатыр. Алайда зардап шеккен тарапты нақты қолдау шаралары әлі қарастырылмаған. Бүгінде бұралқы иттерді аулау жұмыстары кестеге сай және тұрғындардан түскен өтініштер негізінде жүргізіледі.

Әкімдік шаруа қожалықтары мен тұрғындар үшін малды қараусыз қалдырмау, қоршауларды биік ету және тағы да басқа түсіндіру жұмыстарын жүргізіп жатыр, - деді Бекболат Қабатбаев.

Сондай-ақ аудандық кәсіпкерлік және ауыл шаруашылығы бөлімі қазір кәсіпкер Құмар Нұрпейісованың бизнесін қайта ашып, дамытуы үшін «Бір ауыл, бір өнім» бағдарламасына қатыса алатынын айтты.

Сонымен қатар «Нұр капитал» бағдарламасы бойынша несиенің қалған берешегі туралы мәселені қарастырып жатырмыз, - деді Мұнайлы ауданық кәсіпкерлік және ауыл шаруашылығы бөлімі басшысының орынбасары.

Фото: goodfon.ru

асыл тұқым Ауыл бұралқы ит ешкі Маңғыстау облысы

Бізді Google-дың негізгі дереккөздер тізіміне қосыңыз

Қосу

Маңғыстау облысында асыл тұқымды 40 ешкі бұралқы иттерге жем болды

Соңғы жаңалықтар