Назарбаевтың банкі рекордтық пайда тапты

Ресейдегі Нұрсұлтан Назарбаев қоры бақылауындағы банк рекордтық пайдаға жетті, деп хабарлайды POLITICO.KZ, ORDA арнасына сілтеме жасап.

"Азия-Тынық мұхиты банкі" (АТБ) 2024 жылғы қаржылық нәтижелерін жариялап, 11,3 млрд рубль (59,2 млрд теңге) таза пайда тапқанын көрсетті. Банк сайтында жарияланған Ресейдің Орталық банкінің мәліметіне сәйкес, банк пайызының кірісі 31,2 млрд рубльді (162,4 млрд теңге) құраған.

АТБ-ның бұл табысы рекордтық деңгейде болып, соңғы айда 15,54%-ға өскен. Соңғы үш жылда, яғни банк Назарбаев қорының бақылауына өткеннен бері, жалпы 19,88 млрд рубль (103 млрд теңгеден астам) пайда тапқан.

Айта кетейік, банк 2021 жылы Ресей Орталық банкі оны саудаға шығарғаннан кейін Назарбаев қорының бақылауына өткен. Сатып алушы ретінде "Pioneer Capital Invest" ЖШС әрекет еткен, бұл компания Назарбаев қоры мен экс-президентке қатысты басқа да құрылымдарға тиесілі.