Нұрай Серікбайдың өлімі: Шерхан Аймаханға кесілген жаза өзгермеді

21 жастағы Нұрай Серікбайды өлтіргені үшін сотталған Шерхан Аймахан өмір бойына бас бостандығынан айыру жазасын өтейді. Шымкент қалалық сотының қылмыстық істер жөніндегі сот алқасы қорғаушылардың жазаны өзгерту, ал жәбірленуші тараптың өтемақыны көбейту туралы шағымдарын қанағаттандырмады, деп хабарлайды Politico.kz.

Қалалық соттың хабарлауынша, бірінші сатыдағы сот Аймаханды үш бап бойынша кінәлі деп таныған. Оған Қылмыстық кодекстің 99-бабы 2-бөлігінің 5-тармағымен аса қатыгездікпен адам өлтіргені, 115-1-бабымен адамның еркіне қарсы байланыс орнатып, аңдығаны және 125-1-бабының 1-бөлігімен некеге тұруға мәжбүрлегені үшін жаза кесілген.

Сондай-ақ сот жәбірленуші тараптың талабын ішінара қанағаттандырып, Аймаханнан моральдық зиян үшін 25 миллион теңге, адвокат қызметіне кеткен шығын үшін тағы 5 миллион теңге өндіруге шешім шығарған. Алайда жәбірленушінің адвокаты моральдық зиян өтемін 10 миллиард теңгеге дейін көтеруді сұраған.

Ал Аймаханның қорғаушылары оны 125-1-баптың 1-бөлігі бойынша ақтап, адам өлтіруге қатысты айыпты 99-баптың 1-бөлігіне ауыстыруды және соған сай әділ жаза тағайындауды өтінген. Прокурор екі тараптың да шағымын қанағаттандырмай, үкімді сол күйінде қалдыруды сұраған.

Сот алқасы Аймаханның кінәсі туралы бұрынғы тұжырымдармен келісіп, Қылмыстық-процестік кодекстің 433-бабында көрсетілген үкімді өзгертуге немесе оның күшін жоюға негіз таппаған. 2026 жылғы 24 қыркүйектегі қаулымен жаза да, өндірілетін өтемақы да өзгеріссіз қалып, үкім заңды күшіне енді.