Парадта трибунаға өткізбеген ардагерді 9 мамырда өтетін шараға шақырды

Астанада әскери парад кезінде трибунаға кіргізілмей қалған ардагер Теңдік Изақов 9 мамырда өтетін гүл шоқтарын қою рәсіміне ресми түрде шақырылды, деп хабарлайды POLITICO.KZ.

Бұл шешім әлеуметтік желіде тараған және қоғам назарын аудартқан оқиғадан кейін қабылданды. Ардагермен әкімдік өкілі жеке кездесіп, орын алған жағдайға байланысты кешірім сұраған. Айта кету керек, Теңдік Изақов – жай ғана еңбек ардагері емес, ол — Қазақстандағы тұңғыш нейрохирург. 1932 жылы 8 наурызда Қарағанды облысының Қарқаралы ауданына қарасты Еңбек ауылында дүниеге келген. 13 жасында еңбек майданына қатысып, алғашқы медалімен марапатталған. 1951 жылы орта мектепті аяқтаған соң, Қарағанды мемлекеттік медицина институтына түсіп, 1957 жылы оқуын аяқтап шыққан.