«Қара бүркіт» емес: Атырауда 4 адамды өлтірген Сұлтан Сәрсемәлиев туралы тың дерек шықты

Атырау облысында төрт бірдей адамның өмірін қиғаны үшін өмір бойына бас бостандығынан айырылған Сұлтан Сәрсемәлиев 19 қыркүйекте Жезқазғандағы №62 колонияға кезең-кезеңмен ауыстырылды (этапталды), деп хабарлайды Politico.kz.

"АқЖайық" газетінің нақтыланған мәліметінше, дәл осы түзеу мекемесі қазіргі уақытта өмір бойына сотталғандарды ұстауға бейімделіп, қайта жабдықталуда.

Сәрсемәлиевке қатысты сот үкімі 14 шілдеде шыққан еді. Сот оған жазасын төтенше қауіпсіздік қылмыстық-атқару жүйесі мекемесінде өтеумен өмір бойына бас бостандығынан айыру жазасын тағайындады. Сотталушы үкімге шағым түсірмегендіктен, 3 қыркүйекте шешім заңды күшіне енді.

№62 мекеме Жезқазған қаласының өндірістік аймағында орналасқан және ол Қарағанды облысы мен Ұлытау облысы бойынша Қылмыстық-атқару жүйесі департаментіне қарайды.

Бұған дейін аралас қауіпсіздік мекемесі мәртебесіне ие болған колонияны 2026 жылы қайта бейімдеу туралы шешім қабылданған. ҚАЖД мұны өмір бойына бас бостандығынан айырылғандар үшін қосымша орындар ашу қажеттілігімен түсіндірді. Осыған байланысты ғимараттарды жөндеу және қайта жасақтау жұмыстары басталған. Ал белгілі бір мерзімге сотталған азаматтарды бос орындар жасақтау үшін біртіндеп басқа түрмелерге көшіру жоспарланған.

Қазіргі уақытта №62 мекемеде қанша адам жазасын өтеп жатқанын және ол жерге тағы кімдердің ауыстырылғанын ҚАЖД қызметтік ақпарат ретінде жарияламай отыр.