Қазақмыс өндірісті цифрландыруға 4 миллиард теңгеден астам қаражат бөлді

Қазақмыс корпорациясы өндірісті басқару мен жұмысшылар қауіпсіздігін қамтамасыз ету мақсатында цифрлық құралдарды белсенді түрде енгізіп жатыр, деп хабарлайды Politico.kz.

Биыл компания ғылыми-зерттеу бағытына және жаңа құралдарды орнатуға 3,3 млрд теңге бөлсе, тағы 800 млн теңге геотехникалық сүйемелдеу мен кен орындарының үш өлшемді моделін жасауға жұмсалмақ. Бұл күрделі геомеханикалық модельдер тау-кен жұмыстарын жоспарлау сапасын айтарлықтай жақсартып, өндірістік қауіп-қатерді барынша азайтуға мүмкіндік береді.

Кәсіпорында жұмысшылардың қауіпсіздігіне баса назар аударылып, желдеткіш қондырғыларды автоматтандыру мен Жомарт кенішінде аэрогаздық бақылау датчиктерін орнату жұмыстары қарқын алды. Оған қоса техника мен адамдардың соқтығысуын болдырмайтын арнайы жүйелер, сейсмикалық мониторинг және апаттың алдын алуға арналған өзге де заманауи шешімдер белсенді түрде сынақтан өткізілуде.

Цифрлық трансформацияның басты элементі ретінде Jezqazgan Tau-ken Ondirisi кәсіпорнында бірыңғай диспетчерлік қызмет құрылып жатыр. Ол өндіріс барысын, жабдықтардың жұмысын және қызметкерлердің нақты қай жерде жүргенін уақытпен санаспай бақылауға мүмкіндік беретін ортақ платформа болмақ. Сонымен қатар тау-кен техникасының борттық компьютерлері арқылы жанармай шығыны мен көліктердің жай-күйі туралы мәліметтер жиналып, техниканы барынша тиімді әрі қауіпсіз пайдалануға жол ашылады.

Өндіріс аймағындағы бақылауды күшейту мақсатында жұмысшыларды автоматты түрде медициналық тексеруден өткізу және нысанға кіруді басқару жүйелері іске қосылуда. Енді қызметкерлерге тапсырмалар электронды цифрлық қолтаңба арқылы беріліп, барлық ақпарат кеніштің цифрлық картасында жедел көрсетілетін болады, ал ұжымның ыңғайы үшін корпоративтік қызметтерді біріктірген SEN мобильді қосымшасы қолданысқа енгізілмек.