«Қазақмыс» жұмысшылар жатақханасын жөндеуге 126 млн теңге бөлді

«Қазақмыс» корпорациясы «Абыз» кенішіндегі 150 жұмысшыға арналған жатақхананы жаңартуға 126 млн теңге бөлді, деп хабарлайды Politico.kz.

Жатақхананың жалпы ауданы 969 шаршы метрден асады. Қазіргі уақытта жатын бөлмелер мен ортақ орындар толықтай жаңартылып жатыр. Құрылысшылар қабырға мен еден жабындарын ауыстыруда. Ғимараттағы терезелер мен есіктер де жаңадан қойылады. Бұған қоса электр желілері мен жарықтандыру жүйесі кешенді түрде жаңартылады. Жуынатын бөлмелерде жаңа сантехника мен кафель орнатылып жатыр.

Жөндеу жұмыстары кеншілердің күнделікті өміріне кедергі келтірмейді. Процесс кезең-кезеңімен жүзеге асуда. Құрылыс үшін бір уақытта тек екі бөлме босатылады. Онда тұратын жұмысшылар уақытша басқа орындарға көшіріледі. Бұл ретте қызметкерлердің ауысымдық жұмыс кестесі міндетті түрде ескеріледі.

Нысанды жаңарту жұмыстарын 2026 жылдың соңына дейін аяқтау жоспарланған. Бұдан кейін кеніш жұмысшылары ауысым арасында қолайлы жағдайда демалатын болады.

Жалпы бұл жатақхана компанияның ауқымды бағдарламасы аясында жөнделіп жатыр. Корпорация 2026 жылы 80-нен астам әлеуметтік нысанды жаңартуға 2,4 млрд теңге бөлген. Бұл қаражатқа кәсіпорындардағы медициналық пункттер мен асханалар жөнделеді. Сондай-ақ жұмысшылар күнделікті пайдаланатын өзге де тұрмыстық кешендер ретке келтіріледі. Мұның бәрі қызметкерлердің күш-қуатын қалпына келтіруі үшін жайлы жағдай жасауға бағытталған.