Қазақстандықтардың мобильді аударымдары тексеріліп, салық органдарынан хабарлама жіберіледі

2026 жылғы 15 сәуірге дейін банктер қазақстандықтардың күмәнді мобильді аударымдары туралы мәліметтерді салық органдарына ұсынады, деп хабарлайды Politico.kz.

Ал осы мерзімнен кейін жасырын кәсіпкерлік белгілері анықталған азаматтарға ресми хабарламалар жіберіле бастайды. Бұл туралы Stan.kz «Курсив» порталына сілтеме жасап хабарлады.

Мемлекеттік кірістер комитетінің мәліметінше, 2025 жылдың қарашасында кәсіпкерлік табыс белгілері бар мобильді аударымдарға қатысты жаңа бақылау критерийлері бекітілген. Аталған талаптар 2026 жылғы 1 қаңтардан бастап күшіне енді.

Жаңа тәртіпке сәйкес, банктер салық органдарына ақпаратты әр тоқсан сайын, тоқсан аяқталғаннан кейінгі айдың 15-інен кешіктірмей жолдауы тиіс.

«Осы талаптарға сай, банктерден түсетін алғашқы мәліметтер 2026 жылдың бірінші тоқсанының қорытындысы бойынша 15 сәуірге дейін салық органдарына беріледі», – деп хабарлады комитет.