Қазақстанның бұрынғы Бас көлік прокуроры Мақсат Дүйсеновке іздеу жарияланды

Қазақстанның бұрынғы Бас көлік прокурорына іздеу жарияланды, деп хабарлайды POLITICO.KZ

ҚР Бас прокуратурасының құқықтық статистика және арнайы есепке алу порталында бұрынғы бас көлік прокуроры Мақсат Дүйсеновке қатысты іздеу жарияланғаны белгілі болды.

Порталдағы іздестіру карточкасына сәйкес, Дүйсеновке қатысты іздестіру ісі 29 тамызда Алматы қаласының Алмалы аудандық полиция басқармасы тарапынан тіркелген. Құжатта оның үш күннен бері іздеуде екені көрсетілген.

Мақсат Дүйсенов өз мансабында қаржы полициясында және прокуратура жүйесінде қызмет атқарған. Ол экс-сенатор, бұрынғы Бас прокурор және қаржы полициясының басшысы болған Қайрат Қожамжаровпен бір кезеңде жұмыс істеген. Сол уақытта Дүйсенов Алматы қалалық қаржы полициясының филиалын басқарған әрі бас көлік прокуроры лауазымын атқарған.