Қордайда 2 жасар бүлдіршін балабақшада бассейнге батып кетті

12 тамыз 2026, 16:22 803

Қордайда 2 жасар бүлдіршін балабақшада бассейнге батып кетті — Фото: видеодан скрин

Жамбыл облысының Қордай ауданындағы Қалғұты ауылында орналасқан балабақшалардың бірінде орын алған қайғылы оқиға салдарынан 2 жасар сәби көз жұмды. Бүлдіршін балабақша ауласында тұрған үрлемелі бассейндегі суға батып кеткен, деп хабарлайды Politico.kz.

Бұл сұмдық жайт туралы журналист Руслан Өтепбай өзінің әлеуметтік желідегі парақшасында хабарлады.

Қайтыс болған баланың анасы балабақша қызметкерлерінің өз міндеттеріне салғырт қарағанын айтады. Оның айтуынша, бақылаусыз қалған бүлдіршін ауладағы бассейнге құлап кеткен.

Баласынан айырылған отбасы бұл оқиға бойынша әділ әрі жан-жақты тергеу жүргізілуін талап етуде.

«Баламның өліміне кімнің жауапты екенін анықтап, қызметіне салғырт қараған және қауіпсіздік талаптарының сақталуына жауапты тұлғалар заң алдында жауап берсін », – дейді сәбидің жақындары.

Қаралы отбасы бүлдіршіннің бассейнге қалай тап болғанын, сол мезетте тәрбиешілердің қайда жүргенін және балалардың қауіпсіздігіне кім тікелей жауапты екенін анықтауды сұрайды.