Қызылорда облысындағы 5 елді мекеннің жаңа әкімдері сайланды

Қызылорда облысының тұрғындары өткен жексенбіде маңызды саяси таңдау жасады. Өңірдегі бір қала, бір кент және үш ауылдың тізгінін ұстайтын жаңа әкімдердің есімі белгілі болды, деп хабарлайды Politico.kz.

Бұл жолғы сайлауда халықтың белсенділігі жоғары болды. Әсіресе, Арал қаласындағы дода тартысты өтіп, әкім тағына төрт бірдей үміткер таласқан.

Арал қаласының тұрғындары бірауыздан Ренат Жанаевты жаңа әкім етіп сайлады. Ол бұған дейін аудандық кәсіпкерлік және өнеркәсіп бөлімін басқарған тәжірибелі маман. Қаладағы 22 мыңнан астам сайлаушының 18 мыңға жуығы өз таңдауын жасап, саяси белсенділік танытқан.

Ал Шиелі кентінің орталығын басқару мүмкіндігі Аманкелді Өмірәліге бұйырды. Ол үш кандидаттың ішінен дауыс саны жағынан оқ бойы озып шықты.

Сонымен қатар, осы ауданға қарасты Жиделіарық ауылының жұртшылығы да жаңа басшысын анықтады. Бұл қызметке сайлауда жеңіске жеткен Ерлан Әбілдашев кіріспек.

Жалағаш ауданының қос ауылында да саяси науқан қызу өтті. Ақсу ауылдық округінде тұрғындардың 65 пайыздан астамы дауыс беріп, нәтижесінде көпшіліктің қолдауымен Мейрамбек Сығайбаев жеңіске жетті. Ал Жаңаталап ауылының әкімі болып Қуаныш Әбдіқалықов сайланды.

Сайлауда жеңіске жетіп, өзін-өзі ұсынған жаңа әкімдердің барлығы «AMANAT» партиясының мүшелері.