Руслан Өскенәлі құрылыс жұмыстарын тексеріп, университетке көшет отырғызды

21 қазанда «Қазақмыс корпорациясы» ЖШС басқарма төрағасы Руслан Өскенәлі Ұлытау облысындағы әлеуметтік және инфрақұрылымдық жобалардың құрылысымен танысты. Жұмыс сапарында нысандардың сапасына, құрылыс мерзіміне, қоғамдық орындарды абаттандыруға, спорт және білім беру инфрақұрылымын дамытуға көңіл бөлді, деп хабарлайды Politico.kz.

Алдымен Жезқазғандағы Кеңгір су қоймасының жағалауында жүргізіліп жатқан жұмыстарды көрді. Жоба «Қазақмыс» қаржысына жүзеге асырылып жатыр. Оған 3,4 млрд теңге бөлінген.

Жағалауға жақын жерде облыстық орталық мешіттің құрылысы да аяқталуға жақын. Жұмыстар біткен соң бұл аумақ серуендеуге, демалуға және бос уақыт өткізуге арналған біртұтас қоғамдық орынға айналмақ.

Руслан Өскенәлі «NAMYS» академиясының аумағында салынып жатқан ашық спорт алаңына да барды. Мұнда футбол алаңы мен воркаут аймағын жабдықтау жоспарланған.

Академияда күрес, күш жаттығулары, спорттық ойындар мен биге арналған залдар бар. Бұдан бөлек, 150 орындық жатақхана қарастырылған. Жастар мұнда білім алып, спортпен қатар айналыса алады.

Жезқазғандағы «Жастар» саябағын жаңғырту жұмыстары да тексерілді. Жобаның құны 4,9 млрд теңге.

Саябақта жаяу жүргіншілер мен велосипедшілерге арналған жолдар, субұрқақ, заманауи балалар алаңдары және көгалдандырылған орындар болады. Жұмысты 2026 жылдың IV тоқсанында аяқтау жоспарланған.

Компания басшысы Серке Қожамқұлов атындағы Қазақ музыкалық-драма театрының күрделі жөндеу жұмыстарымен де танысты. Ғимаратты жаңартуға 5,1 млрд теңге бөлінген. Жөндеу 2027 жылдың I тоқсанында аяқталуға тиіс.

Сәтбаев қаласында Руслан Өскенәлі «Кенші даңқы» алаңын абаттандыру барысын тексерді. Кеншілердің еңбек дәстүріне арналған қоғамдық кеңістік 3,3 млрд теңгеге жаңартылып жатыр.

Негізгі құрылыс жұмыстарын 2026 жылдың IV тоқсанында аяқтау көзделген. Ал көгалдандыру 2027 жылдың II тоқсанына дейін жалғасады.

Жұмыс сапары кезінде Ұлытау университетінің құрылысы да назардан тыс қалмады. Мұнда негізгі оқу корпусы мен спорт залының құрылысы аяқталуға жақын. 140 орындық жатақхананың құрылысы жалғасып жатыр.

Университет өңір жастарының жоғары білім алу мүмкіндігін кеңейтуге арналған. Мұнда тау-кен өндіру, металлургия және басқа да салаларға білікті мамандар даярлау көзделген.

Университетке барған кезде «Қазақмыс» басшылығы аумақты көгалдандыруға қатысып, көшет отырғызды.

Сапар қорытындысында Руслан Өскенәлі құрылыс сапасына, белгіленген мерзімдердің сақталуына және жобалардың әрі қарай жүзеге асырылуына көңіл бөлді.

«Қазақмыс» компаниясы жұмыс істейтін өңірлердегі әлеуметтік инфрақұрылымды дамытуды жалғастыратынын мәлімдеді. Компанияның негізгі бағыттарының бірі Жезқазған мен Сәтбаев тұрғындарына қолайлы орта қалыптастыру, білім алу, спортпен шұғылдану және демалу мүмкіндіктерін кеңейту.