Судья Айгүл Сайлыбаеваның өліміне қатысты енесі мен жұбайына іздеу салынды

Қазақстанның Ішкі істер министрлігі Германияда 2024 жылы қаза тапқан судья Айгүл Сайлыбаеваға қатысты жаңа деректер бойынша оның жұбайы мен бұрынғы енесіне іздеу жариялады. Бұл ақпарат құқықтық есеп жүргізетін ресми порталға енгізілген.

Александр Донцов пен Наталья Донцованы Талдықорған қаласының полиция бөлімі іздестіріп жатыр. Іздеу шаралары Жетісу өңірінде 2025 жылдың 9 желтоқсанында тіркелген.

Бұған дейін министрлік өкілдері Қазақстан аумағында Сайлыбаеваға жасалған зорлық-зомбылыққа қатысты қосымша қылмыстық іс қозғалғанын хабарлаған. Вице-министр Санжар Әділовтің сөзіне қарағанда, бұл дерек Айгүл Сайлыбаева мен оның жұбайы сол кезеңде Жетісу өңірінде жүрген уақытпен байланысты.

Ал Германияда Сайлыбаева қаза болған іске қатысты тергеу жалғасуда. Сол елдің құқық қорғау құрылымдары да марқұмның бұрынғы енесі Наталья Донцоваға іздеу жариялаған.

Айгүл Сайлыбаева – Астанадағы Сарыарқа ауданында қызмет еткен бұрынғы судья, «Болашақ» бағдарламасының түлегі. 2024 жылдың маусым айының басында Бенсхайм қаласында із-түзсіз жоғалып кеткен. 4 маусым күні ол қызын балабақшаға апарғаннан кейін байланысқа шықпай қалған. Түстен кейін қызын әжесі, Наталья Донцова, алып кеткені белгілі болды. Осы сәттен кейін екеуімен байланыс үзілген.

Бірнеше аптадан соң Айгүлдің денесі Бенсхаймның шет жағынан пластик қаптың ішінен табылды. Денесінде қолына, мойнына және бетіне салынған пышақ жарақаттары анықталған.

Марқұммен бір мезгілде жоғалған 49 жастағы Наталья Донцованы да сол уақыттан бері ешкім көрмеген.