"Суретке түспек болған": Қостанайда вагонға шыққан жасөспірімді тоқ соқты

Қостанай облыстық ауруханасының дәрігерлері теміржол вагоны үстінде тоқ соғып, денесінің 60 пайыздан астамын ауыр күйік шалған 15 жастағы баланы аман алып қалды, деп хабарлайды Politico.kz "Наш Костанай" басылымына сілтеме жасап.

Үйіне баратын жолды қысқарту үшін теміржол бойымен өткен тоғызыншы сынып түлегі әлеуметтік желіге сурет жариялау мақсатында вагонның төбесіне шыққан. Тұра берген кезінде электр доғасы соғып, екпінмен екі метр жерге ұшып түскен.

"Нәтижесінде электр жарақатын алып, денесінің 60 пайыздан астам бөлігін ауыр термиялық күйік шалды. Оны бірден жансақтау бөліміне жібердік. Ол онда бір жарым ай жатты. Қуанышына орай, қолдары мен аяқтарын аман алып қала алдық", – деді травматолог-ортопед Мирас Елжасов.

Маманның мәліметінше, мұндай ауыр жарақатта науқастардың 90%-ы алғашқы аптада көз жұмады. Науқасқа демеушілер есебінен қымбат дәрі-дәрмектер алынып, бейтаныс адамдар сирек кездесетін төртінші теріс топтағы қан тапсырған. Қазір бойжеткен жасөспірім палатаға ауыстырылды, алдағы екі-үш апта бойы емделуін жалғастырады.

Оқиғаға дейін екі күн бұрын электрик мамандығына құжат тапсырған жасөспірім енді медицина саласына түсуге бел байлады. Ол құрдастарына үндеу жасап, қауіпті әрекеттерге бармауға шақырды.