«Тыныш жүре алмай қалдық»: Алматылықтарға жасөспірімдер шабуыл жасауда (ВИДЕО)

Алматыда жасөспірімдердің агрессив әрекеті қоғамда қызу талқылануда, деп хабарлайды Politico.kz.

Әлеуметтік желілерде бір топ жасөспірімнің 28 гвардияшы-панфиловшылар паркі аумағында өтіп бара жатқан адамдарға шабуыл жасаған сәті тарады.

Жәбірленушілердің бірі таңертең жұмысқа бара жатқанда белгісіз жасөспірімдер оған шабуыл жасағанын айтады. Оның сөзінше, олар адамдардың заттарын тартып алып, үстіне су шашып, тас лақтырып, соққыға жыққан. Оқиғадан кейін зардап шеккендер полицияға жүгінген. Алайда олардың айтуынша, шағым түскеніне қарамастан, жасөспірімдер парк аумағында жүре берген.

Бұл жағдайға байланысты Алматы қалалық полиция департаменті тексеру жұмыстарын бастағанын хабарлады. Қазіргі таңда іс материалдары Медеу аудандық полиция басқармасының қарауында.

Оқиғаның мән-жайы анықталып жатыр.