«Ұрып-соғып, далаға тастап кетті»: Ұлдарынан жәбір көрген қария көмек сұрады

Жетісу облысы Ақсу ауданында екі ауыл тұрғыны өз әкесін аяусыз ұрып-соқты және қорлады деген күдікке ілінді, деп хабарлайды Politico.kz.

Оқиға ауданға қарасты ауылдардың бірінде болған. 62 жастағы тұрғын әлеуметтік желіде көмек сұрап, көпшілікке үндеу жариялаған. Оның айтуынша, ұзақ уақыт бойы екі ересек ұлы тарапынан қысым көріп келеді. Олар әкесінен үнемі ақша талап етіп, күш қолданған.

Қарияның сөзінше, оның төрт ұлы бар, олардың екеуі өз отбасыларымен бірге сол ауылда тұрады. Аталған ұлдары әкесінен жиі материалдық көмек сұрайды. Алайда оның қаржылық жағдайы тұрақты емес. Соған қарамастан, олар жанжал шығарып, күш көрсетеді. Бір жағдай кезінде ұлдары әкесін ауыл шетіне апарып, ұрып-соғып, жеңіл киіммен қалдырып кеткен. Үйіне зорға жеткен қария бір айға жуық ем қабылдаған.

Ер адам 2013 жылы отбасымен бірге Қытайдан Қазақстанға қоныс аударған. Қазіргі уақытта ауылдағы шағын шеберханада етікшілікпен айналысады. Оның айтуынша, ұлдары тек үйде ғана емес, жұмыс орнында да тәртіпсіздік жасап, мүлкіне зиян келтіріп, құралдары мен жеке заттарын тартып алған.

Қария бірнеше рет полицияға жүгінген. Нәтижесінде оның екі ұлы жауапкершілікке тартылып, сот шешімімен уақытша қамауға алынған. Алайда олар босап шыққаннан кейін де қысым көрсетуін тоқтатпаған.

Қария өз жағдайының ауыр екенін айтып, көмек сұрайды. Бұған дейін болған жанжал кезінде үшінші ұлы әкесін қорғаймын деп жарақат алған. Ал биылғы ақпанда екі ұлы тағы да күш қолданып, тұншықтыруға дейін барған. Көршілер араласпағанда жағдайдың қалай аяқталары белгісіз еді. Қазіргі таңда күдіктілер қайтадан қамауға алынған.

Сонымен қатар, қария жеке құжаттарының жоғалғанын айтып отыр. Оның айтуынша, төлқұжат пен жеке куәлігін ұлдарының бірі алып қойған. Осы мәселе бойынша ол құқық қорғау органдарынан көмек сұраған.

Полиция деректеріне сәйкес, қылмыстық іс аясында күдіктілер ретінде 31 және 34 жастағы ұлдары анықталған. Полиция ақсақалдың екі ұлын қамауға алған. Сот үкімімен оларға жәбірленушіге жақындауға тыйым салынған. Қамаудан шыққан соң профилактикалық есепке алынады.

Бұл оқиға әлеуметтік желіде қызу талқыланып, қоғамда үлкен резонанс тудырды. Көпшілік Қазақстанда үлкенді, әсіресе ата-ананы құрметтеу маңызды екенін атап өтті.