Зейнетақы жинағын шешу шегі неге қайта өсті? Еңбек министрлігі толық түсіндірме берді

Еңбек және халықты әлеуметтік қорғау министрлігі зейнетақы жинақтарын мерзімінен бұрын пайдалану үшін белгіленетін ең төменгі жеткіліктілік шектерінің көтерілуіне қатысты ресми түсінік берді, деп хабарлайды Politico.kz.

Ведомствоның мәліметінше, бұл өзгеріс жаңа есептеу әдістемесіне байланысты енгізілген. Енді зейнетақы жүйесі салымшының жасын, зейнетке шығуға дейінгі қалған жылдарын, болашақта төленетін төлем көлемін, инвестициялық табысты және ұзақ мерзімді қаржылық тұрақтылықты ескеріп есептейді.

Министрлік соңғы үш жыл бойы бұл шектер қайта қаралмағанын атап өтті. Сол себепті инфляция, демографиялық өзгерістер және жинақтардың нақты сатып алу қабілеті де жаңа есептеулерге енгізілген.

Мамандардың айтуынша, негізгі мақсат – азаматтардың болашақтағы зейнетақы табысын төмендетіп алмау және жүйенің тұрақтылығын сақтау. Яғни, азаматтар бүгін қаражатты шешіп алған жағдайда, ертеңгі зейнетақы көлемі жеткілікті деңгейде қалуы тиіс.

Сонымен бірге, жинақтарды пайдалану мүмкіндігі толығымен жойылмайды. Егер зейнетақы төлемдері бұрынғы табыстың кемінде 40 пайызын қамтамасыз етсе, азаматтар жинақтарының 50 пайызына дейін пайдалана алады. Ал кейбір санаттағы зейнеткерлер (еңбек сіңірген зейнеткерлер) өз шотындағы қаражатты толық көлемде шешіп алу құқығын сақтайды.

Министрлік бұл өзгерістер халықтың жинақтарын шектеу үшін емес, ұзақ мерзімде қаржылық қауіпсіздікті қамтамасыз ету үшін жасалғанын атап өтті.