“Зорлық көрсетті”: Танымал рэпер шоуда айтқан әңгімесінен кейін сынның астында қалды

Қазақстанда рэпер De Lacure (Ануар Баймұхаев) қатысқан «Мне стыдно» шоуының әлі эфирге шықпаған шығарылымы үлкен қоғамдық резонанс тудырды, деп хабарлайды Politico.kz.

Жазбаға сәйкес, оқиға бойынша құқық қорғау органдары ресми түрде хабардар етілген.

Шоудың түсірілімінде қонақ ретінде келген De Lacure жеке өміріне қатысты «ұят оқиға» деп сипатталған әңгіме айтқан. Куәгерлердің сөзінше, оның әңгімесінде зорлық-зомбылыққа қатысты ауыр мазмұн болған, ал кейбір қатысушылар сол жағдайға бейжай қараған деген пікірлер тараған. Бұл кейін әлеуметтік желілерде үлкен дау тудырды.

De Lacure өзіне тағылған айыптарды жоққа шығарып, бұл оқиғаның бұрмаланып тарағанын айтты. Оның сөзінше, ол мектеп кезіндегі (16–17 жас) бір жағдайды баяндаған және онда болған оқиға «екі жақтың келісімімен болған» деп түсіндірген. Сонымен қатар, ол әңгімені дұрыс таңдамағанын мойындап, көпшілік алдында кешірім сұрады.

Шоудың жүргізушісі, стендапер Зарина Байболова құқық қорғау органдарының жағдайға қатысты тексеру бастауын күтетінін айтты. Оның сөзінше, түсірілім кезінде қонақтың әңгімесі күтпеген және түсініксіз болғандықтан, түсірілім бірден тоқтатылмаған.

Оқиға жария болғаннан кейін әлеуметтік желілерде рэперді «бойкоттау» туралы пікірлер көбейді. Қолданушылар оны және жағдайға қатысы бар адамдарды құқықтық жауапкершілікке тартуды талап етуде.

Құзырлы органдар жағдайға құқықтық баға беріп жатыр. Шоу командасы ресми тексеріс нәтижесін күтетінін хабарлады.

Айта кетейік, De Lacure — қазақстандық рэп-орындаушы және продюсер. Ол заманауи қазақ рэп сценасында әлеуметтік желілер арқылы танымал болған жас орындаушылардың бірі.