Абай облысында қыз зорлаған сотталушы түрмеден қашып кетті

Абай облысында кәмелетке толмаған қызды зорлағаны үшін сотталған азаматтың қашып кеткені туралы ақпарат тарады. Бұл деректі облыстық Полиция департаменті растады, деп хабарлайды Politico.kz.

Полиция мәліметінше, аталған азамат 2021 жылы шартты түрде бас бостандығынан айырылған. Алайда биыл маусым айында жазаны өтеу тәртібін бірнеше мәрте бұзғандықтан, сот оның қалған жаза мерзімін нақты бас бостандығынан айыру жазасына ауыстырған.

Ведомствоның хабарлауынша, серуендеу кезінде сотталған адам уақытша ұстау изоляторының аумағынан заңсыз шығып кеткен. Жедел ұйымдастырылған іздестіру шараларының нәтижесінде ол көп ұзамай ұсталып, қайтадан изоляторға қамалған.

Қазіргі уақытта аталған оқиғаға байланысты қызметтік тексеру жүргізіліп жатыр.