Алсу Ержан Максим қатысқан “Голос” финалындағы дауыстың қолдан көбейтілгенін мойындады

Әнші Алсу 2019 жылы “Голос. Дети” шоуындағы қызы Микелла Абрамованың жеңісіне байланысты дауға алғаш рет ашық пікір білдірді. Өнер иесі финалда дауыс беруге араласу болғанын растады. Алайда оның сөзінше, бұл жағдайға өзі де, қызы да қатысы болмаған, деп хабарлайды Politico.kz.

Алсудың айтуынша, дауыс беруге араласудың артында бұрынғы күйеуі Ян Абрамов тұрған. Әнші жағдайды тоқтатуға тырысқанын да жасырмады.

“Не болып жатқанын түсінгенде, күйеуіме “Тоқтатшы, бұлай жасама” дедім. Бірақ ол сөзіме құлақ аспады. Әке ретінде қызына жақсылық жасағысы келді”, – деді әнші.

Сондай-ақ ол шоу қатысушылары мен көрермендерден кешірім сұрап, бұл оқиғаның қызына ауыр тигенін айтты.

Еске салсақ, 2019 жылғы финалда қазақстандық әнші Ержан Максим екінші орын алған еді. Кейін дауыс беру нәтижесі тексеріліп, “Бірінші арна” финал қорытындысын жойған болатын. Соңында барлық финалист жеңімпаз деп танылды.