АҚШ Украинадағы атом электр станцияларын өз бақылауына алмақ

Украинадағы атом энергетикасының ең сенімді қорғанысы – оны АҚШ-тың басқаруына беру деп мәлімдеді Трамп, деп хабарлайды POLITICO.KZ.

The Times басылымының хабарлауынша, АҚШ Президенті Дональд Трамп Украина Президенті Владимир Зеленскийге елдегі атом энергетикасын Америка Құрама Штаттарының бақылауына беру ең тиімді қорғаныс болатынын айтты.

Ақ үйдің мәліметінше, Трамп бұған дейін АҚШ компанияларының Украинадағы мұнай, газ және сирек кездесетін металл кен орындарын игеруге қатысты ұсынылған жобадан әлдеқайда ауқымды қадам жасаған. Бастапқы келісім табиғи ресурстар мен порт инфрақұрылымын басқаруға бағытталса, атом энергетикасы туралы сөз болмаған еді.

Жақында Financial Times басылымына берген сұхбатында Владимир Зеленский АҚШ тарапымен тек Запорожье атом электр станциясын бақылауға беру жайында талқылағанын айтты. Бұл станция – Еуропадағы ең ірі АЭС және қазіргі уақытта Ресейдің бақылауында, әрі майдан сызығына жақын орналасқан. Дегенмен, Ақ үй басшылығы президенттер электр энергиясы мен атом станциялары туралы кеңірек талқылағанын мәлімдеді.

Fox News арнасына берген сұхбатында АҚШ энергетика министрі Крис Райт Америка бірнеше атом электр станциясын өз меншігіне алуға дайын екенін және бұл бейбітшілікке жетуге көмектесетінін атап өтті. Сондай-ақ ол АҚШ-тың бұл станцияларды еш қиындықсыз басқара алатынын мәлімдеді.

Телефон арқылы жүргізілген келіссөздерден кейін Ресей бақылауындағы аумақтардың болашағы толық айқын болмады. Дегенмен сарапшылардың пікірінше, АҚШ-тың ұсынысы Ресей мен Украина арасында ұзақ мерзімді бейбітшілік орнатуға мүмкіндік беретін ең тиімді нұсқа болып отыр.

Америка Құрама Штаттарының Мемлекеттік хатшысы Марко Рубио мен ұлттық қауіпсіздік жөніндегі кеңесші Майк Уолтц бірлескен мәлімдемеде Трамп пен Зеленский арасындағы әңгімеде Украинаның энергетикалық жүйесі мен атом электр станциялары талқыланғанын растады.

«АҚШ-тың осы станцияларды өз бақылауына алуы Украина инфрақұрылымын қорғаудың және энергетикалық тұрақтылықты қамтамасыз етудің үздік жолы», – делінген мәлімдемеде.

Сондай-ақ Владимир Зеленский азаматтық нысандарды қорғау үшін қосымша әуе қорғанысы жүйелерін, әсіресе Patriot зымыран кешендерін сұрағаны белгілі болды. Президент Трамп Украинаға қолжетімді жүйелерді табуға, әсіресе Еуропадан қамтамасыз етуге уәде берген.