АҚШ-та ұшақ дәрі-дәрмек қоймасына құлады

Калифорнияның Фуллертон қаласында жеңіл моторлы ұшақ қонуға әрекет жасаған кезде жергілікті ауруханаға тиесілі дәрі-дәрмек қоймасына соғылып, қайғылы оқиғаға ұласты, деп хабарлайды POLITICO.KZ.

Оқиға қаланың әуежайына жақын маңда орын алған. Алдын ала мәліметтерге сәйкес, ұшақ пилоты қону кезінде басқаруды жоғалтып алған. Соның салдарынан қоймаға соғылып, күшті өрт басталған. Өрт қойманың кең аумағына тез таралып, ғимаратқа айтарлықтай зиян келтірді.

Апат салдарынан ұшақ пилоты мен жолаушысы қаза тапты. Сондай-ақ, қоймада жұмыс істеген 18 адам зардап шеккен. Олардың 10-ы түрлі жарақаттармен ауруханаға жеткізілді, ал қалғандарына оқиға орнында медициналық көмек көрсетілді.

Оқиға орнына өрт сөндірушілер мен құтқарушылар шұғыл жетті. Өрт сөндірілгенімен, қойма ғимараты айтарлықтай зақымданған. Аурухана басшылығы қайтыс болғандардың туыстары мен зардап шеккендерге көңіл айтты. Олар бұл қойманың өңірдегі медицина мекемелерін қажетті дәрі-дәрмекпен қамтамасыз етуде маңызды рөл атқарғанын атап өтті.

Апаттың себептері әлі белгісіз. АҚШ-тың Федералды азаматтық авиация басқармасы мен Ұлттық көлік қауіпсіздігі кеңесі бірлескен тергеу жұмыстарын бастады.

Бұл аймақта жеңіл моторлы ұшақтардың қатысуымен болған апаттар жиі кездесетінін сарапшылар атап өтуде.