Астанадағы мейрамханаларға ит еті араласқан ет өнімдері сатылған

Астанадағы кейбір танымал дәмханалар мен мейрамханаларға қатысты күтпеген ақпарат тарады, деп хабарлайды Politico.kz сайты Todayinfo.kz-ке сілтемемен.

Жануарларды қорғаушылардың айтуынша, елордадағы қоғамдық тамақтану орындарының бірқатарында қолданылған фарш құрамына ит еті қосылған болуы мүмкін.

Белсенділер бұл деректердің бірнеше жыл бұрын өткен сот процесі кезінде белгілі болғанын айтады. Олардың сөзінше, қалада жасырын түрде ит етін дайындап, оны түрлі тағам өндірісіне өткізумен айналысқан адамдар болған.

Қоғам белсендісі Сергей Снегиревтің мәліметінше, бақылау барысында күдіктілер аз көлемнің өзінде ондаған келі ет ұсынған. Кейін тексеру кезінде жүздеген келі ет өнімдері тәркіленгені айтылды. Тергеу нұсқасы бойынша, бұл өнімдер басқа ет түрлерімен араластырылып сатылуы мүмкін болған.

Зообелсенділер сондай-ақ қаңғыбас жануарларға қатысты жағдайларға да назар аударды. Олардың айтуынша, кей аймақтарда жануарларды аулау жұмыстары ет өңдеумен айналысатын мекемелерге берілген жағдайлар кездескен.

Подкаст қонақтары бұған дейін Алматы облысында анықталған жануарларды жаппай ұстау орындарын да еске алды. Еріктілердің айтуынша, ол жерден қаңғыбас қана емес, иесі бар үй жануарлары да табылған.

Қоғамда бұл мәлімдемелерден кейін қоғамдық тамақтану орындарындағы өнім сапасы мен жануарларға қатысты заң талаптары қызу талқылана бастады.