Атырауда мұғалімге 80 млн теңге талап еткен белгісіз адам мектепті жаруға сес көрсетті

Атырауда мектеп мұғаліміне 80 миллион теңге бопсалап, мектепті жарып жіберемін деп қорқытқан белгісіз адамға қатысты тергеу басталды, деп хабарлайды POLITICO.KZ.

Оқиға 6 ақпан күні сағат 11:30 шамасында №3 мектептің тарих пәні мұғалімінің телефонына келіп түскен хабарламадан басталған. Белгісіз адам 80 млн теңгені көрсетілген есепшотқа аударуды талап етіп, егер талап орындалмаса, мектепті 14:00-де жарып жіберетінін айтқан.

Мұғалім бірден құқық қорғау органдарына хабар берді. Оқиға орнына жедел қызмет өкілдері келіп, мектеп аумағын тексерді. Облыстық білім басқармасының мәліметінше, бұл ақпарат жалған болып шыққан.

«Қазіргі таңда жағдай толық бақылауда. Мектепте сабақтар қалыпты режимде жалғасуда», – деп хабарлады Атырау облыстық білім басқармасы.

Полиция департаменті бұл іс бойынша тергеу амалдарының басталғанын және қаскөйді анықтау жұмыстары жүргізіліп жатқанын мәлімдеді.