Баян Алагөзова: Тұрсенғалиды кездестіргелі сабырлы болуды үйрендім

Продюсер Баян Алагөзова сезім, жеке құндылықтар және отбасылық өмірдегі ішкі өзгерістері туралы ой бөлісті. Ол өмірлік жары Тұрсенғали Алагөзовпен қарым-қатынасы мінезі мен көзқарасына қалай әсер еткенін баяндады. Сонымен қатар продюсер жан дүниесіндегі өсу процестері мен отбасылық үйлесімділік сырларын бөлісті, деп хабарлайды Politico.kz.

Баян Алагөзова бұл туралы Аман Тасығанмен болған сұқбатта әңгімеледі.

«Махаббат — бұл жүрегіңнен, денеңнен немесе өзіңнен ажыратып алғың келмейтін бөлшегің сияқты. Адам өзінің саусағын кесіп алғысы келмейді ғой, дұрыс па? Махаббат деген — дәл осы. Мен мұны өте кеш, 42 жасымда бастан кешірдім. Мен шынымен де ғашық болдым, сүйдім. Бұл — ерекше сезім. Ол іссапарға кеткен кезде, үш күннен кейін оралатынын білсем де, осы үш күнде бойымда өзімнің бір бөлігім жоқ сияқты болып тұрады. Сүйенерге ештеңе таппай қалғандай күй кешемін. Дәл қазір үстелге немесе орындыққа сүйеніп отырғаным сияқты, ештеңеге арқа сүйей алмай, ішімде бостық орнағандай болады. Мен үшін махаббат деген — осы. Бұл — оны сағыну және ол жоқта ішіңнің пысуы. Ол жанымда болмаса, ішім қатты сүреңсіз болып кетеді, өйткені онымен бірге болу өте көңілді. Сөйлескің, күлгің, әзілдескің, еркелегің келеді. Біз әлі күнге дейін осылай уақыт өткіземіз. Бір-бірімізді түртіп, шұқылап, сықылдап күліп жүреміз. Екеумізге бірге болған өте ұнайды», — деді Баян Алагөзова.

Әңгіме барысында продюсер өз бойындағы өзгермейтін тұрақты моральдық нормаларға тоқталды. Ол уақыт өтсе де адамгершілік пен шыншылдық сияқты өмірлік іргетасы берік сақталатынын атап өтті. 

«Мен үшін махаббат — осы адамсыз ішіңнің пысуы. Ішіңнің пысқаны — оны сағынғаныңды білдіреді. Мен оны сағынамын. Сондай-ақ қандай да бір бостықты сезінесің. Мен үшін махаббат деген — дәл осы. Жоқ, мен қатты өзгере қойған жоқпын. Мен — өте принципіме берік адаммын, өзіндік ұстанымдарым бар және олар әрқашан өзгеріссіз қалады. Бұл, әрине: адамгершілік, шыншылдық, мейірімділік, бөлісуге және көмектесуге деген ұмтылыс, сондай-ақ үйретуге деген ықылас. Осындай негізгі, түпкілікті мәні бар құндылықтар — менің бойымдағы өзгермейтін іргетасым», — деді продюсер.

Сондай-ақ Баян Алагөзова ерлі-зайыптылардың бір-біріне тигізетін өзара ықпалы мен мінез-құлықтағы трансформацияны сөз етті. Ол жолдасының арқасында сабырлылық танытып, әділеттілік ұғымына тереңірек қарай бастағанын жеткізді. Продюсер бұрынғы қызбалығы мен қазіргі пайымдауы арасындағы айырмашылықты келесідей сипаттады.

«Тұрсен маған жиі айтады: "Менің жанымда ол керісінше мейірімдірек болып кетті", ал мен оның жанында сабырлырақ болған сияқтымын. Мен бұрын қаншалықты эмоционалды әрі қызба екенім есіңізде ме? Бұрын өзімнің ұстанымдарымды дәлелдеймін деп, отырған бұтағымды өзім шауып тастауға да дайын едім: "Бұл — әділетсіз, бұл — шындыққа жатпайды!" деп шыға келетінмін. Ал қазір мен үшін әділеттілік ұғымы әлдеқайда кеңейді. Бұл соғыс сияқты ғой: біреу үшін ол — туған ана, ал біреу үшін — сұм соғыс. Мен үшін бұл әділеттілік болса, сіз үшін әділетсіздік болуы мүмкін және мен сіздің позицияңызды түсіне аламын. Мүмкін сіз жақта да өзіндік шындық бар шығар», — деді ол.

Оған қоса медиакеңістік өкілі отбасындағы келіссөз мәдениеті мен компромисс табудың маңыздылығын тілге тиек етті. Жолдасының ақыл-кеңесі оның бойындағы әйелдік нәзіктікті арттырып, таласудан арылуға көмектескенін жасырмады. Сөзін түйіндей келе, ол өзімшілдік пен тек өзінікін дәлелдеу әдетінің артта қалғанын баяндады.

«Тұрсен мені мынаған үйретті, ол: "Ешқашан келіссөз процесінен шығып кетпе, ешқашан. Соңғы есікті ешқашан жаппа, кішкентай болса да орын қалдыр" дейді. Ол менің мінезімді біледі, кейде маған өзіндік ұстанымдары бар ер-азаматтардың тұтас бір полкі кіріп кететін еді. Мен өзімді нәзік әйел ретінде сезіне бастадым. Бұрын өзімді "белдемше киген еркек" сияқты сезінетінмін. Бойымда еркектік энергия өте көп болды: бәрін шешіп, кесіп-пішіп, сөзбен де, іспен де соққы бере алатын едім. Ал қазір мен толықтай нәзік әйелге айналдым. Арманға: "Қойшы, таласпай-ақ қояйықшы, сіздікі дұрыс. Окей? Мен сізбен керіскім келмейді, сіздікі дұрыс. Егер сіздікі дұрыс болғанынан өз-өзіңізді жақсы сезінсеңіз, сіздікі-ақ дұрыс бола берсін, ал менікі бұрыс болсын. Мен "Окей, менікі қате" деп айта аламын" деймін. Бұрын мен ешқашан бұлай істемейтін едім! Әрқашан "тек менікі дұрыс, менің шындығым" дейтінмін. Маған әрқашан жеңімпаз болып, менікі дұрыс екенін дәлелдеу маңызды еді», — деді Баян Алагөзова.