Базалық мөлшерлеме қарашада тағы да көтерілуі мүмкін - Тимур Сүлейменов

Ұлттық банк мөлшерлемені қарашада тағы көтеруі мүмкін, деп хабарлайды POLITICO.KZ.

Егер инфляция баяуламаса, қараша айында базалық мөлшерлеме қайта көтерілуі мүмкін. Бұл туралы ҚР Ұлттық банкінің төрағасы Тимур Сүлейменов мәлімдеді.

Ол бұл пікірін базалық мөлшерлеменің 18%-ға дейін көтерілуіне қатысты түсініктеме берген кезде айтты. Оның сөзінше, инфляция деңгейі жоғары болып қала берсе, ақша-несие саясаты одан әрі қатаңдатылуы ықтимал.

«Қажет болса, инфляция біртіндеп баяуламайтын болса, бізге ақша-несие жағдайларын қалыпты деңгейде ұстап тұру үшін мөлшерлемені тағы да көтеруге тура келеді. Бұл шешім қараша айында қабылданады. Себебі сол кезде біз экономикалық болжамдарды толық жаңартып, жағдайға жан-жақты баға береміз», –  деді Тимур Сүлейменов Ұлттық банкте өткен брифингте.