«Бес бала тудым, күтінген жоқпын»: Роза Әлқожа енесі мен келіні туралы айтты
Танымал әнші Роза Әлқожа жас босанған әйелге көрсетілетін күтім туралы сөз қозғап, кезінде өзіне енесі қарайласпағанын ашық айтты, деп хабарлайды Politico.kz.
Өнер иесі бес бала сүйсе де, босанғаннан кейін арнайы күтінбей, бірден үй шаруасына кірісіп кеткенін жеткізді. Оның айтуынша, енесі мұндай күтімді білмейтінін ашық ескерткен.
«Енем мен бала туған кезде "сені күте алмаймын, ондайды білмеймін. Мені күтпеген" деді. "Жақсы" дедім. Бес бала тудым, ешқайсында күтінген жоқпын. Шауып жұмыс істеп кете бердім», – деді әнші.
Алайда өнер иесі бұл жағдайды келініне қайталамауды ұйғарған. Ол келіні дүниеге сәби әкелгенде оны жатқызып қойып, үй шаруасының бәрін өзі атқарғанын айтты.
«Ал мен келініме олай істемеймін. Келінімді жатқызып қойып күттім. Өзім үй жинап, ыдыс жуып, тамақ істедім. Өйткені ол – менің ұрпағымның анасы», – деді ол.
Әнші жас анаға күтім жасауды кез келген адам үйрене алатынын айтып, «өзгерісті өзімнен бастадым» деп сөзін түйіндеді.
Соңғы жаңалықтар
