Биылғы апат кезінде әскерилер елмен бірге ауқымды жұмыстың алдыңғы шебінен табылды — Олжас Бектенов

Қазақстан Республикасының Премьер-Министрі Олжас Бектенов Қазақстан халқын Отан қорғаушы күнімен құттықтады.

«Құрметті қазақстандықтар! Баршаңызды Отан қорғаушы күнімен шын жүректен құттықтаймын! Қашанда қайсарлық пен асқақ рухтың жарқын үлгісін көрсетіп келе жатқан айбынды армиямыз — еліміздің тәуелсіздігі мен тұтастығының мызғымас кепілі. Мемлекет басшысы — Жоғарғы Бас қолбасшы Қасым-Жомарт Кемелұлы Тоқаевтың тікелей қолдауымен бүгінде Қарулы Күштеріміздің әскери әлеуетін жаңғыртуға, кәсіби деңгейін сапалы дамытуға ерекше назар аударылып келеді. Біз Отан алдындағы қасиетті борышына адалдық танытқан қаһармандарымызды ұдайы мақтан тұтамыз» дейді Олжас Бектенов мерекелік лебізінде.

Оның айтуынша, биылғы алапат табиғи апат кезінде әскери қызметшілер де елмен бірге ауқымды жұмыстардың алдыңғы шебінен табылған. Бұл орайда сарбаздарымыз бен сардарларымыздың қажырлы еңбектері шексіз құрметке лайық.

«Әркез абырой биігінен көрініңіздер. Осынау мерейлі күні Қарулы Күштеріміздің ардагерлеріне, ел тыныштығын қорғап жүрген әскери қызметшілердің барлығына мықты денсаулық, шаңырақтарына бақ-береке тілеймін. Егемен еліміздің еңсесі биік, іргесі берік болсын!» дейді Үкімет басшысы.

Пікірлер (0)