Депутат Бақытжан Базарбек Алматы облысының әкімі Марат Сұлтанғазиевтің отставкаға кетуін талап етті

Мәжіліс депутаты Бақытжан Базарбек Алматы облысының әкімі Марат Сұлтанғазиевтің отставкаға кетуін талап етті

Мәжіліс депутаты Бақытжан Базарбек Facebook парақшасында бейнеүндеу жариялап, Қасым-Жомарт Тоқаевтың Бағанашылдағы балалар үйінің жетімдерін Қонаев қаласына көшіру туралы шешімді тоқтатқанын әділетті қадам деп бағалады. Депутат бұл жағдай жергілікті және орталық атқарушы органдар жұмысының жүйелі мәселелерін ашып бергенін айтты.

Базарбек осыдан бір жыл бұрын-ақ балалар үйі орналасқан жер телімінің тағдырына алаңдаушылық білдіргенін еске салды. Оның айтуынша, Бағанашылдағы нысан орналасқан жер құрылыс компаниялары үшін үлкен қызығушылық тудырады, ал қолданыстағы шектеулерге қарамастан, оны иемденуге талпыныс болған.

Депутат көшіру процесінде ашықтықтың болмағанын, балалар үйі ғимаратының техникалық жағдайына қатысты қорытындының жасырылғанын және бұл іске полиция араласқанын сынға алды. Сондай-ақ, ЖШС "АстанаҚұрылысСервис" берген техникалық қорытындының заңдылығына күмән келтірді.

Базарбек бұл іске қатысы бар барлық лауазымды тұлғалардың, соның ішінде оқу-ағарту министрі, Алматы облысы білім басқармасының және облыс әкімі Марат Сұлтанғазиевтің жауапкершілігін атап өтті. Оның айтуынша, Сұлтанғазиев бастапқыда балаларға көшіру болмайды деп уәде беріп, кейін өзі көшіру туралы қаулыға қол қойған. Бұл әрекет халықтың билікке деген сеніміне нұқсан келтірді.

Сөз соңында депутат облыс әкімінің отставкаға кетуін және балаларды заңсыз көшіруге қатысы бар лауазым иелерінің жауапқа тартылуын талап етті. Оның бұл ұстанымын Бала құқықтары жөніндегі уәкіл Динара Закиева да қолдады.

Айта кетейік, Базарбек бұл мәселені алғашқылардың бірі болып биылғы наурызда көтерген. Сол кезде ол балалар үйінің жер телімі дауға түсетінін айтып, тексеріс бастаған болатын. Кейін Қонаевтағы жаңа ғимараттың әлі мемлекет меншігіне өтпегені белгілі болып, көшіру заң талаптарына қайшы жүргізілгені анықталған.