Депутат мәжіліс отырысында анасын туған күнімен құттықтады

Бүгін Мәжілістің жалпы отырысында депутат Ардақ Назаров ресми баяндамасын тоқтатып, анасын туған күнімен құттықтады, деп хабарлайды POLITICO.KZ.

Депутаттық сауалдарды жариялау кезінде ол кенеттен іскерлік күн тәртібінен тыс сөз алып, анасына жылы лебізін білдірді.

«Менің анашымның бүгін туған күні еді, 70 жасқа толып отыр. Қадірлі анашым, сізді туған күніңізбен шын жүректен құттықтаймын! Сіздің мейірімге толы жүрегіңізге және жүзіңізден төгілген нұрға шомылып өстім.

Анашым, әкетайым екеуіңіз құстың қос қанатындай мәңгі бірге болып, Құдай бере салған немерелеріңіздің қызығын көріңіздер. Анашым, мен сізді қатты жақсы көремін, сіздің алдыңызда басымды ием. Баршаңыздың аналарыңыз аман болсын!», — деді Ардақ Назаров.