Екібастұздағы сауда орталығының төбесі опырылып түсті: 5 адам жарақат алды

Екібастұз қаласындағы М. Әуезов көшесінде орналасқан сауда орталығының төбесі опырылып түсті, деп хабарлайды POLITICO.KZ.

Алдын ала мәліметтер бойынша, 150 шаршы метр аумақтағы төбе конструкциясы құлаған. Құлаған қалдықтар демалыс аймағына түскен.

Бес адам жарақат алды, олардың үшеуі кәмелетке толмаған балалар. Барлық зардап шеккендер өз бетінше медициналық көмекке жүгінген.
Денсаулық сақтау басқармасының мәліметінше, олардың жағдайы ауыр емес, диагноз – жұмсақ тіндердің жарақаты. Барлығына амбулаторлық ем тағайындалған.

Сауда орталығы уақытша жабылды.
Тиісті органдар апаттың себебін анықтауға кірісті.
Ғимараттың техникалық жағдайы мамандар тарапынан тексерілуде.

Қазіргі таңда құрылыс нормаларының сақталуы мен техникалық ақаулардың бар-жоғы тексеріліп жатыр. Мамандар төбе конструкциясының дұрыс орнатылмауы немесе тозуы себеп болуы мүмкін деп болжайды.

Тексеру жұмыстары аяқталған соң сауда орталығының ашылуы туралы қосымша хабарланатын болады.