"Элиталы мектепте оқыған": танымал кәсіпкердің қызы буллингке ұшырап, өзіне қол жұмсады
Отандық кәсіпкер Қанат Әміркин Facebook парақшасында QSI-Almaty мектебінде оқитын қызы бір жыл бойы жүйелі түрде буллингке ұшырағанын жазды, деп хабарлайды Politico.kz.
«Қызымды ауруханаға алып бара жатқанын естігенде, өзіне қол жұмсамақ болғанын білдім. Бұл — бір күнде болған жағдай емес, бір жыл бойы еленбеген мәселелердің салдары», — деп жазды кәсіпкер.
Әміркиннің айтуынша, қызына сыныптастары тарапынан қысым көрсетіліп келген, ал мұғалімдер бұл әрекеттерге тосқауыл қоймаған. Тіпті, мектеп басшылығына кірудің өзі қиын болғанын айтады.
Кәсіпкер буллингті бастағандардың бірі бұрынғы әкімнің қызы екенін меңзеп, баланың әлеуметтік мәртебесіне қарамай, тәрбие мен жауапкершілік бірінші орында тұруы тиіс екенін атап өтті.
Ең сорақысы — мектеп әкімшілігінің жауабы. Кәсіпкердің сөзінше, олар елдегі суицид статистикасын алға тартып, бұл жағдайға ықпал ете алмайтынын айтқан. Жылына шамамен 25 мың доллар төленетін элиталық мектептің мұндай ұстанымы қоғамның ашуын тудырды.
Айта кетейік, QSI-Almaty Forbes.kz нұсқасы бойынша Алматы мен Астанадағы үздік 25 жекеменшік мектептің ішінде 4-орында тұр. Мектептің жылдық кірісі шамамен 6,4 млрд теңге, ал айлық оқу ақысы 1,4 млн теңгеге жуық. Оқыту ағылшын тілінде жүргізіледі, оқу бағдарламасы америкалық жүйеге негізделген.
Соңғы жаңалықтар
