«Келешек» бағдарламасы қандай мүмкіндік береді

«Мемлекет басшысының тапсырмасы бойынша «Келешек» бірыңғай ерікті жинақтау жүйесін енгізу жөніндегі заң жобасы әзірленді. Құжат жобасы қазіргі кезде қарау үшін Қазақстан Республикасының Парламентіне енгізілді.

«Келешек» жүйесі мемлекеттен бастапқы білім беру капиталын, мемлекеттік сыйлықақыны жыл сайын төлеуді, инвестициялық табысты көздейді. Бұл жинақтар «Ұлттық қор – балаларға» жобасы аясында қалыптастырылған қаражатпен бірге балаларға сапалы білім алуға мүмкіндік береді»

Атап айтқанда, «Келешек» жүйесі үш негізгі міндеті ескеріп отыр. Бұл тұрғыда білім алу мүмкіндігін кеңейту, мемлекеттік қолдаудың барлық іс-шараларын бірыңғай жүйеге шоғырландыру, сондай-ақ әрбір ата-ана баласының кішкентай кезінен оқу траекториясын құра алатын жүйені құру тәртібі қамтылмақ. Былтырғы Жолдауында Мемлекет басшысы Қасым-Жомарт Тоқаев 5 жастан асқан балаларға арналған «Келешек» атты бірыңғай ерікті жинақтау жүйесін енгізуді тапсырды.

«Бұл бағдарламада мемлекет тарапынан ұсынылатын бастапқы білім беру капиталы, жыл сайынғы мемлекеттік сыйақы және инвестициялық табыс қарастырылуға тиіс. Осы жинақ пен «Ұлттық қор – балаларға» жобасының қаражаты қосылғанда жас ұрпақтың сапалы білім алуына мүмкіндік туады», - деді Президент.