Киев АҚШ-тан 30-50 миллиард доллар көлемінде көмек сұрады

Украина президенті Владимир Зеленский елдің АҚШ-тан жаңа әскери көмек пакетін сатып алуға дайын екенін мәлімдеді, деп хабарлайды POLITICO.KZ Bloomberg агеннігіне сілтеме жасап.

Киев әлі де Вашингтоннан болашақта өмірлік маңызы бар қолдау алу мүмкіндігі бойынша жауап күтуде. Зеленскийдің айтуынша, Украина АҚШ-тан 30-50 миллиард доллар көлемінде көмек сұрады және оны төлеуге дайын екенін білдірді — не тікелей АҚШ-қа, не әлі құрылмаған пайдалы қазбаларды дамыту бойынша бірлескен қор арқылы.

"Біз келесі пакетті тегін сұраған жоқпыз", — деп атап өтті Зеленский сәрсенбі күні Киевте өткен баспасөз мәслихатында.

АҚШ президенті Дональд Трамп Украинаның болашақта пайдалы қазбалар өндіруден түсетін табыстың бір бөлігін АҚШ-пен бөлісуін талап етіп отыр. Ол мұны Украинаға берілген ондаған миллиард долларлық көмек үшін өтемақы ретінде қарастырады.

Өз кезегінде Киев АҚШ тарапынан болашақ инвестициялардың көлемін ұлғайтуды талап етуде және Вашингтонға ерекше құқықтар беру Украина үшін Еуроодаққа кіру процесін қиындатуы мүмкін деген алаңдаушылық білдіріп отыр.

Болжам бойынша келісімге сәйкес, Украина экономикасының айтарлықтай бөлігінен түсетін болашақ табыстың жартысын АҚШ-қа беруі мүмкін. Алайда Киев бұрын берілген көмекті қарыз ретінде мойындаудан бас тартуда және қолайлырақ шарттарды көздеп отыр.

Зеленский сондай-ақ Украина Джо Байден әкімшілігі бұрын мақұлдаған әскери көмекті алуды жалғастырып жатқанын, бірақ оның толық көлемін қашан алатынын нақтыламады.