Лондонда өтетін бейбіт келіссөздердің деңгейі төмендетілді

Ресей-Украина қақтығысын тоқтату бойынша Лондонда өтуі тиіс бейбіт келіссөздердің дипломатиялық деңгейі төмендетілді, деп хабарлайды POLITICO.KZ Sky News агенттігіне сілтеме жасап.

Ұлыбритания, АҚШ, Франция, Германия және Украинаның жоғары лауазымды дипломаттары бүгінгі жоспарланған жоғары деңгейдегі кездесуін кейінге қалдырды.

Оның орнына бес елдің жоғары деңгейлі шенеуніктері қатысатын келіссөздер өтпек. Алайда Украина сыртқы істер министрі әлі де Лондонда болып, Ұлыбритания сыртқы істер министрі Дэвид Лэммимен екіжақты кездесу өткізеді деп күтілуде.

Дипломатиялық деңгейдің төмендеуі Дональд Трамп пен оның командасының Киев пен Мәскеуге атысты тоқтату туралы келісімге келуге бағытталған қысымының күшейген тұсына сәйкес келді.

Лондонда талқылануы тиіс американдық бейбіт ұсыныс бойынша АҚШ Ресейдің Қырымды қосып алуын мойындауы тиіс еді, бірақ бұл идеяны сейсенбі күні Владимир Зеленский жоққа шығарды. Сондай-ақ бұл ұсыныс бойынша бейбіт келісімнің бір бөлігі ретінде майдандағы қазіргі шептерді қатырып қою көзделген.

Хабарларға қарағанда, Украина одақтастары кез келген территориялық жеңілдіктерге жауап ретінде қауіпсіздік кепілдіктері мен қайта құру жобаларына қол жеткізуге үміттенеді.

Марко Рубио Лондонға келіп, Лэмми және Украина, Франция мен Германия сыртқы істер министрлерімен кездесуі керек еді, алайда сейсенбіде оның келмейтіні белгілі болды.

Осыдан кейін Париж бен Берлин де өз министрлерінің сапарларын кейінге қалдырған сияқты. Дегенмен министрлер деңгейіндегі кездесу жақын арада қайтадан ұйымдастырылады деген үміт бар.