Мәжілісте қант диабетіне арналған дөңгелек үстел өтті

Мәжілісте депутат Гүлдара Нұрымованың жетекшілігімен қант диабетімен ауыратын науқастарды қолдауға арналған дөңгелек үстел өтті, деп хабарлайды POLITICO.KZ.

Отырысқа депутаттармен бірге Денсаулық сақтау министрлігінің және қоғамдық ұйымдарының өкілдері қатысты.

Денсаулық сақтау вице-министрі Ержан Нұрлыбаевтың мәліметінше, Қазақстанда қант диабетімен ауыратын 570 мыңнан астам адам бар. Олардың жартысынан көбі әйелдер, ал ең көп үлесі (56%) 60 жастан асқан тұрғындарға тиесілі.

Дөңгелек үстел барысында қант диабетін диагностикалау мен емдеудің заманауи тәсілдері ұсынылды. Бас эндокринолог Лаура Даньярова мен басқа да мамандар инновациялық терапия және жаңа дәрілік құралдарды қолдану мәселесін талқылады.

Депутат Гүлдара Нұрымова отырысты қорытындылай келе, медициналық қызметтердің қолжетімділігін арттыру, медицина мамандарын оқыту және жаңа технологияларды енгізу арқылы қант диабетімен ауыратын науқастардың өмір сапасын жақсартуға болатынын айтты.