Қазақстанда тағы бір тасжол ақылы болды: Жүргізушілер енді қанша төлейді?

15 қарашадан бастап Қазақстандағы Ақтөбе – Қандыағаш тасжолының бір бөлігі ақылы режимге көшті, деп хабарлайды Politico.kz.

Жаңа тәртіп жеңіл автокөлік иелеріне де, автобус пен жүк көліктерінің жүргізушілеріне де қатысты. Алайда жеңіл көліктер үшін жолдың тек белгілі бір бөлігіне ақы төлеу қарастырылған.

«ҚазАвтоЖол» мәліметінше, ақылы жолдардың қатарына республикалық маңызы бар Ақтөбе – Қандыағаш тасжолының 89 шақырымдық бөлігі қосылды. Осылайша, ол бұған дейін ақылы болған Қандыағаш – Мақат бағытымен біріктірілді. Нәтижесінде ақылы бағыттың жалпы ұзындығы 469,5 шақырымға жетті.

Дегенмен жолдың барлық бөлігінде жеңіл автокөліктерден ақы алынбайды. Атап айтқанда, 11-шақырымнан 87,2-шақырымға дейінгі аралықта көліктің барлық түріне төлем қарастырылған. Ал қалған бөліктерде ақы тек автобустар мен жүк көліктерінен алынады.

Жеңіл автокөлік жүргізушілері үшін ақылы учаскеден бір бағытта өту құны алдын ала төлем жасаған жағдайда шамамен 240 теңгені құрайды. Ал жолдан өткеннен кейін төлем жасалса, тариф 276 теңгеге дейін жетеді.

Жаңа ақылы учаскеде көлік қозғалысын бақылау үшін арнайы 10 арка орнатылған. Олар жолдан өтіп бара жатқан көліктердің мемлекеттік нөмірлерін автоматты түрде тіркеп, төлем сомасын есептейді.

Осыған байланысты жүргізушілерге әр бақылау бекетінің жанында тоқтап, жеке төлем жасау қажет емес. Жол ақысын белгіленген тәртіппен алдын ала немесе сапар аяқталғаннан кейін төлеуге болады.