Мешітте "тамағы тесік" деп қайыр сұраған әкенің ұлы сау болып шықты
Бішкекте бүлдіршінін айықпас дертке шалдықты деп жамағатты алдаған азаматтың ісіне қатысты тексеру аяқталды. Жергілікті құқық қорғау өкілдері тұрғынның келтірген дәлелдерінің жалған екенін мәлімдеді. Аталған жайт желіде видео тарап, көпшілік талқысына түскеннен кейін іске асты. Бейнежазбада құлшылық үйлерінде намаз оқылып жатқанда, қолындағы нәрестесін құшақтаған ер адамның жұрттан қаржылай қолдау сұрап тұрғаны көрінеді. Ол сәбиінің ауыр науқас екенін, тіпті "тамағында тесік бар" деп, оны емдеуге ірі көлемде қаражат керектігін айтқан, деп хабарлайды Politico.kz.
Азаматтың сөзіне сеніп, есепшотына ақша салғандар табылған. Десе де, желідегі кейбір оқырмандар бұл азаматтың Орталық Азия елінің астанасындағы бірнеше құлшылық үйін аралап жүргенін хабарлап, оның әрекетіне күмән келтірді.
Тәртіп сақшылары тексеріс барысында 1988 жылы дүниеге келген азаматтың кім екенін анықтады. Мемлекеттік уәкілетті мекемелермен бірлесе отырып, олар отбасы тұратын мекенжайға барып, баланың денсаулығы мен тұрмыс жағдайын көзбен көрді.
Тексеру қорытындысы бойынша:
- Сәбидің денсаулығы мықты болып шықты.
- Оның әкесі айтқан сырқаттар да, "тамақтағы тесік" те расталмады.
- Отбасында баланың дертке шалдыққанын куәландыратын ешқандай медициналық қағаздар табылған жоқ.
Жиналған құжаттар ары қарай шара қолдану үшін әлеуметтік қорғау мекемелеріне жолданды. Ал жалған ақпарат таратқан азаматтың үстінен Қырғыз Республикасының заңдарына сәйкес әкімшілік хаттама толтырылды.
Бішкек қалалық полициясы азаматтарға қайырымдылықпен айналысқанда абай болуды, қаржылай жәрдем бермей тұрып, көмек сұраушының мәліметтері мен оны растайтын ресми құжаттарын мұқият тексеруді ескертеді.
Соңғы жаңалықтар
