Нұртас Адамбай әйелі туралы: Маған қалай шыдап жүргенін білмеймін

Қазақстандық режиссер әрі продюсер Нұртас Адамбай берген сұхбатында отбасылық өмірі, жұбайымен қарым-қатынасы және шаңырағын сақтап қалуға ықпал еткен діни көзқарастары туралы айтып берді. Киноөнер өкілі ажырасу алдында тұрған кезеңдері мен одан шығу жолдары бойынша жеке тәжірибесімен бөлісті, деп хабарлайды Politico.kz.

Өз сөзінде ол отбасындағы түсіністік пен сабырлықтың басым бөлігі жұбайының арқасында жүзеге әлі де асып жатқанын жеткізді.

«Жұбайыма дән ризамын, өйткені ол — менің өз-өзімді тануыма бәрінен де көп көмектескен әрі әлі де көмектесіп келе жатқан адам. Ол менің мінезіме ең көп шыдамдылық танытатын жан. Мен сияқты адамға шыдау өте қиын деп ойлаймын. Мен өзім шыдай алмас едім, сондықтан оның мұндай төзімділігіне таңғаламын. Мен сияқты адаммен бірге өмір сүріп, шыдауға бойынан қалай күш-қуат табатынын да білмеймін. Бұл — ешқандай асыра сілтеусіз айтылған сөз. Өз мінезімді және кейде өзімді қалай ұстайтынымды білетіндіктен, мұны тіпті тым жұмсартып айтып отырған болармын. Сондықтан, не болса да, оның әрдайым менің қасымнан табылатынына шексіз алғыс білдіремін. Бұл сөздер оның жай ғана қасымда жүргенін білдірмейді, ол мені әрдайым шабыттандырып, ілгері ұмтылуыма ықпал етеді. Маған не істеу керектігін және оны қалай жүзеге асыру қажеттігін үнемі есіме салып отырады. Сондықтан жарымның тұлғасына сүйсінемін, өйткені Жаратқан ием оған ерекше кең де мейірімді жүрек сыйлаған», — деді Нұртас Адамбай.

Сонымен бірге ол некесінің белгілі бір кезеңінде ажырасу туралы ойлардың болғанын жасырмады.

«Сол кезеңде біз де ажырасамыз ба деген ой келді. Себебі айналада болып жатқан оқиғаларға, фильмдерге немесе әзілдерге қарасаң, ажырасу күнделікті қалыпты құбылысқа айналып кеткендей көрінетін. Бұрын мен де солай ойлап: «Ештеңе етпейді, мінезіміз жараспаса, ажыраса саламыз» деген пікірде болдым. Мәселеге осылай жеңіл қарайтын едім. Бірақ соған қарамастан, маған онсыз өмір сүру өте ауыр болды. Жүрегім әрдайым оған тартып тұратын, өйткені ол — менің жұбайым, жақсы көретін адамым. Бойымда үлкен ішкі тартыс жүріп жатты: бір жағынан жалғыз болғаным дұрыс сияқты болып көрінсе, екінші жағынан жарымсыз өмір сүре алмайтынымды ұқтым. Осылайша екі ортада тығырыққа тірелгендей күйде жүрдім», — деді ол.

Сондай-ақ тығырықтан шығуға және ажырасу шешімінен бас тартуға Ислам дініндегі отбасы мен некеге қатысты үкімдерді терең түсінуі себеп болғанын атап өтті.

«Бұл тұрғыда маған Ислам діні үлкен ой салып, ес жиғызды. Меңгергенімдей, Ислам — бүкіл өмірге арналған нұсқаулық. Онда адам өміріне қатысты барлық сұрақтың жауабы бар. Жаратушы бір нәрсені жаратып, оған қолдану нұсқаулығын бермей қоюы мүмкін емес. Тіпті кір жуғыш машина сатып алсақ та, оны бұзып алмау үшін арнайы нұсқаулығы болады. Ал адам сияқты күрделі жаратылыстың нұсқаулықсыз болуы мүмкін емес екені анық. Мен мұны өз тәжірибемнен шығарып айтып отырмын. Намаз оқып, шахада айтып, мұсылмандықты қабылдаған кезде, бойымдағы бір қасиет іске қосылды: Аллаға шүкір, егер бір жолды таңдасам, оны соңына дейін жеткізуге және ережелерге барынша сай болуға тырысамын. Намаз оқып жүрген кезімде кішкентай бала сияқты өкпелеп, ренжісіп немесе жанжал шыққанда, бұрынғы әдетімше «болды, ажырасамын» дегім келіп кететін. Алайда дәл осы сөзді айтқым келген сәтте: «Тоқта, бұл туралы Исламда не айтылған?» деп ойландым. Діни үкімдерге қарасам, егер ер адам ажырасуға шешім қабылдаса, ол бұл туралы әйеліне хабарлап, белгіленген шарттар мен мерзімдерді орындауы тиіс екен. Егер бұл мерзімдердің бәрі аяқталса, ажырасу үдерісі толық аяқталып, ол әйел саған қайтадан халал болмайды. Бұдан кейін өкініп: «Мен қателесіппін, жүр, қайтадан некеге тұрайық» дей алмайсың. Ол әйел басқа еркекпен шынайы түрде некелесіп, кейін онымен де ажырасқан жағдайда өзіңе қайта үйленуге рұқсат етіледі. Осы үкімді оқығанда өзіме: «Тоқта, сен осыған дайынсың ба?» деген сұрақ қойдым. Іштей: «Жоқ, әрине! Менің әйелім қалайша басқа біреуге күйеуге шығады?» деп шештім. Содан соң өзіме: «Олай болса, бұл сөзді айтуға құқығым бар ма?» дедім де, мұндай сөзді мүлде айтпауға шешім қабылдадым. Содан бері әрбір айтатын сөзіме мұқият қарайтын болдым. Егер саналы адам әрі ер азамат болсам, не айтып тұрғанымды толық түсінуім керектігін ұқтым. Егер «ажырасамын» деген сөзді айтуға бекінсем, оның артында қандай салдар жатқанын сезінуім қажет. Осындай белгіленген ережелерге бағынып, өзіңді ретке келтіргенде ғана мұның қаншалықты даналық пен үлкен игілік екенін түсінесің. Себебі осы шариғат талабының арқасында менің отбасым сақталып қалды. Осыдан кейін мұндай сөздерді оңды-солды айтпайтын болдым. Ашуға беріліп айтып жібергім келетін сәттер болса да, өзімді тоқтатып, бұған жол бермеймін», — деді Нұртас Адамбай.