«Отбасы банкі» әйелдерге арналған ипотеканы қашан іске қосады?

Әйелдерге арналған «Ұмай» ипотекасының қашан іске қосылатынын «Отбасы банкі» басқарма төрағасы Ляззат Ибрагимова үкімет отырысындағы брифингте айтты, деп хабарлайды POLITICO.KZ.

Ибрагимованың сөзінше, бағдарламаны іске қосу үшін Азия Даму Банкімен (АДБ) келісімге қол қойылған. Қазіргі таңда банк директорлары кеңесінде бағдарламаның шарттары бекітілуде. «Біз бастапқы жарна 20% болып қалғанын қалаймыз. Бағдарлама бойынша пәтерлерді бастапқы және қайталама нарықтан алуға болады. Мөлшерлеме АДБ-ның ішкі нарықта теңгелік ресурстарды тартуына байланысты белгіленеді», – деді Ибрагимова.

Сонымен қатар, ол банктің халыққа ұсынатын қаржы ресурстары теңгеге негізделуі маңызды екенін атап өтті. «Бағдарлама іске қосылу уақытын биылдың екінші жартысына жоспарлап отырмыз, бірақ мөлшерлеменің ең төмен болуын қамтамасыз ету үшін қолайлы уақыт пен нарықтық жағдайды күтеміз», – деп түсіндірді.

Сондай-ақ, Ибрагимова доллардың өсуі қазақстандықтардың ипотекасына қалай әсер ететіні туралы сұрақтарға жауап берді. Оның айтуынша, «Наурыз» және «Отау» бағдарламаларына қатысушылар үшін жағдай өзгермейді. Бұдан бөлек, басшы бірқатар тұрғын үй бағдарламаларының шарттарын қайта қарау жоспарлары бар екенін мәлімдеді.

Ақпарат nur.kz сайтынан алынған.