«Өте оғаш әрі күлкілі жағдай»: Тоқаев БҰҰ-ны реформалау қажеттігін тағы да айтты

Қазақстан Президенті Қасым-Жомарт Тоқаев Анталия дипломатиялық форумы аясында өткен панельдік сессияға қатысып, жаһандық саясаттағы өзекті мәселелерге қатысты пікір білдірді, деп хабарлайды Politico.kz.

Мемлекет басшысы өз сөзінде Реджеп Тайип Ердоған жетекшілігімен Түркияның халықаралық аренадағы беделі артып келе жатқанын атап өтті. Оның айтуынша, Қазақстан мен Түркия аймақтағы күрделі мәселелерді шешуде маңызды рөл атқара алады.

Президент қазіргі әлемдегі негізгі сын-қатерлерге тоқталып, аймақтық қақтығыстардың бүгінде жаһандық сипат алып бара жатқанын жеткізді. Сонымен қатар, Біріккен Ұлттар Ұйымы жүйесін реформалау қажеттігін тағы да көтеріп, әсіресе Қауіпсіздік Кеңесінің жұмысын жаңғырту маңызды екенін айтты. Тоқаевтың пікірінше, дәл осы құрылым кей жағдайда маңызды халықаралық шешімдердің қабылдануына кедергі келтіреді.

Сондай-ақ, мемлекет басшысы заманауи көшбасшыларға тән қасиеттер ретінде жауапкершілік пен ұстамдылықты атады. Таяу Шығыстағы жағдайға қатысты пікір білдірген ол келіссөздер барысында басты назар ядролық технологиялардың таралуы мәселесіне аударылуы тиіс екенін атап өтті.

Қасым-Жомарт Тоқаев өз сөзінде превентивті дипломатияның маңызын да ерекше атап өтті. Оның айтуынша, қақтығыстардың алдын алу үшін тек мәлімдемелермен шектелмей, нақты іс-қимылдар мен тиімді халықаралық ынтымақтастық қажет.