Қаңтар ҰБТ-сының статистикасы жарияланды

Қазақстанда қаңтар айындағы Ұлттық бірыңғай тестілеу (ҰБТ) басталды, деп хабарлайды POLITICO.KZ.

Білім және ғылым министрлігінің мәліметінше, тестілеуге қатысу үшін 167 мыңға жуық адам өтініш берген. Тестілеуге қатысушылардың:
🔹 76,7%-ы – қазақ тілінде,
🔹 23,2%-ы – орыс тілінде,
🔹 142-сі – ағылшын тілінде тапсыруды таңдаған.

Тестілеудің алғашқы күні еліміз бойынша 2 277 талапкер, оның ішінде Астанада 155 адам сынақ тапсырды.

«Бірнеше жыл қатарынан ең жиі таңдалатын пәндер комбинациясы – "Математика-Физика" (17,5%). Бұл бағытты болашақ инженерлер, механиктер, мұғалімдер, техниктер, энергетиктер мен құрылысшылар таңдайды. Одан кейінгі орында "Биология-Химия" (17,3%) – болашақ медицина мамандары, ал үшінші орында "Математика-Информатика" (10,3%) – IT саласының болашақ мамандары», – деді Білім және ғылым министрі Саясат Нұрбек.

Қаңтар айындағы ҰБТ-ға жазғы тестілеуде шекті балл жинай алмағандар мен шартты түрде ақылы негізде күндізгі оқуға түскендер қатысады.

ҰБТ 10 ақпанға дейін жалғасады.