Қарағанды облысында 50 адам отырған автобус аударылды

Алдын ала мәлімет бойынша, Бесоба ауылынан 15 шақырым жерде вахталық автобус аударылып қалған. Көлік ішінде шамамен 50 адам болған.

Оқиға орнына Қазақстан Төтенше жағдайлар министрлігі құтқарушылары жедел жетіп, зардап шеккендерге көмек көрсетті.

Министрліктің мәліметінше, Қазавиақұтқару әуе кемесі арқылы үш адам Қарағанды қаласындағы медициналық мекемелерге жеткізілген.

Сонымен қатар, құтқарушылар мен дәрігерлердің сүйемелдеуімен тағы 30 адам облыстық ауруханаға жеткізілді. Олардың жағдайы орташа ауыр деп бағалануда.

Апаттық-құтқару жұмыстарына ТЖМ бөлімшелерімен қатар Апаттар медицинасы орталығы, жедел жәрдем бригадалары және полиция қызметкерлері жұмылдырылған.

автобус жол көлік оқиғасы Полиция Қарағанды облысы