Қазақстан мен Ресейдің Жоғарғы соттары алғаш рет келісімге қол қойды
Қазақстан мен Ресейдің Жоғарғы соттары тарихта алғаш рет ынтымақтастық туралы келісімге қол қойды. Құжат сот жүйесін цифрландыруға және жасанды интеллектіні енгізуге жол ашады, деп хабарлайды Politico.kz Ақордаға сілтеме жасап.
Бұл туралы Президент Қасым-Жомарт Тоқаевтың Ресей Жоғарғы сотының төрағасы Игорь Красновпен кездесуінде айтылды.
«Мемлекет басшысы Ресей Жоғарғы сотының төрағасы Игорь Красновты қабылдады
Қасым-Жомарт Тоқаев кездесу барысында ортақ тарихқа, тату көршілікке, сондай-ақ қос халық арасындағы өзара құрмет пен берік байланысқа негізделген Қазақстан-Ресей қарым-қатынасының айрықша сипатына назар аударды.
Президенттің айтуынша, мемлекетаралық қатынастардың жан-жақты стратегиялық серіктестік және одақтастық деңгейіне көтерілуі барлық бағыттағы, соның ішінде құқық саласындағы ықпалдастықтың да дәйекті түрде дамып келе жатқанын көрсетеді.
Қасым-Жомарт Тоқаев еліміздің бүкіл мемлекеттік-құқықтық жүйесін жаңғыртуға бағытталған ауқымды саяси реформаларға тоқталды», – делінген хабарламада.
Ал Игорь Краснов Қазақстанның сот жүйесімен тығыз байланыс орнағанын айтты.
«Өз кезегінде Ресей Жоғарғы сотының төрағасы Қазақстан сотымен белсенді ықпалдастық жолға қойылғанын жеткізді.
Атап айтқанда, тарихта тұңғыш рет екі елдің жоғары сот инстанциялары арасында ынтымақтастық туралы келісімге қол қойылды. Бұл құжат кәсіби диалогқа, сот төрелігін цифрландыруға және жасанды интеллектіні қолданысқа енгізуге негіз болады.
Сонымен қатар Игорь Краснов ғылым және білім беру салаларында, әсіресе, біліктілікті арттыру және сот қызметкерлерінің цифрлық дағдыларын дамыту бағытында серіктестік аясын кеңейтуге мүдделі екенін растады», – деп жазылған хабарламада.
Соңғы жаңалықтар