Қазақстанда бес минуттан артық қозғалтқышты жылытқаны үшін алғашқы айыппұл салынды

Петропавл қаласында бес минуттан артық қозғалтқышты жылыту ережесін бұзғаны үшін алғашқы айыппұл салынды, деп хабарлайды POLITICO.KZ.

Тұрғындардың бірі көршісінің көлігінің қозғалтқышын ұзақ уақыт бойы өшірмей, шу және қолайсыздық туғызғаны туралы полицияға шағымданған. Нәтижесінде көлік иесіне Әкімшілік құқық бұзушылық туралы кодекстің сәйкес бабы бойынша 5 АЕК көлемінде (19 660 теңге) айыппұл салынды.

Қазақстан Республикасының жол қозғалысы ережелеріне сәйкес, тұрғын үй аумағында немесе елді мекендерде көлік қозғалтқышын ұзақ уақыт жұмыс істетуге тыйым салынады. Бұл ереже тұрғындардың жайлылығын қамтамасыз етуге және қоршаған ортаны қорғауға бағытталған.

Ережені бұзу туралы істер тек тұрғындардың шағымы және заң бұзушылықтың нақты дәлелдері болған жағдайда қаралады.

Қыста жүргізушілерге қозғалтқышты 1–2 минуттан артық қыздырмау ұсынылады. Бұл уақыт қазіргі заманғы көліктер үшін жеткілікті. Ұзақ уақыт бойы қозғалтқышты қыздыру тек отын шығынын арттырып қана қоймай, қоршаған ортаға зиянды заттардың көп бөлінуіне алып келеді.