Қазақстанда ҚҚС шегін төмендетуге қарсы петиция жарияланды

Қазақстанда ҚҚС(НДС) шегін 78 млн теңгеден 15 млн теңгеге дейін төмендетуге қарсы петиция жарияланды, деп хабарлайды POLITICO.KZ.

Бұл бастаманы экономист Жангелді Сүлейменов пен заңгер Ануарбек Сқақов көтерді.

28 қаңтарда экономика министрі Серік Жұманғарин шағын және орта бизнеске салық ауыртпалығын арттыратын осы өзгерісті ұсынған болатын. Петиция авторларының айтуынша, бұл шешім кәсіпкерлерге кері әсерін тигізіп, бағаның 20%-ға немесе одан да көп мөлшерде өсуіне алып келеді.

"Көптеген кәсіпкерлер ҚҚС-ті есепке ала алмайды, себебі олардың жеткізушілері бұл салықты төлемейді немесе өздері өнім өндіреді. Нәтижесінде олар табысының едәуір бөлігін мемлекетке беруге мәжбүр болады," – деп түсіндірді Сүлейменов.

Петицияға қол қоюшылар саны күн сайын артып келеді. Олар ҚҚС шегін төмендету кәсіпкерлік белсенділікке кедергі келтіріп, бағаның қымбаттауына және жұмыс орындарының қысқаруына әкеп соғуы мүмкін деп алаңдаулы.