Қазақстандықтардың несиесі кешіріле ме

Қаржы нарығын реттеу және дамыту агенттігінің төрайымы Мәдина Әбілқасымова қазақстандықтардың қарызын жаппай кешіру әзірге жүргізілмейтінін мәлімдеді, деп хабарлайды POLITICO.KZ Stan.kz ақпарат агенттігіне сілтеме жасап.

Оның айтуынша, мемлекет есебінен несиелерді кешіру үлкен тәуекел туғызып, бюджетке ауыр салмақ түсіреді. 2019 жылғы несие амнистиясынан кейін кейбір азаматтар қарыздары кешірілген соң қайтадан несие алып, оны да өтей алмай қалған.

«Бұл моральдық тәуекел тудырады. Адамдар әр 5–6 жыл сайын амнистия болады деп күтеді. Яғни, несие бәрібір кешіріледі деген сеніммен олар төлем жасауды қояды», - деді агенттік басшысы.

Әбілқасымова несие амнистиясы мемлекеттік бюджетке өте үлкен салмақ түсіретінін, сондықтан қазіргі экономикалық жағдайда мұндай шара қолдау таппағанын айтты.